أشهر المعتقدات الخاطئة عند الأمهات في طب الاطفال

Spread the love

 

د. عطية داود أخصائي طب الاطفال وحديثي الولادة

دكتور عطية داود أخصائي طب الاطفال وحديثي الولادة يرسل بعض النصائح المهمه لكل أم طفل حديث الولادة ولكل ام تقبل على الزواج او فى فترة الحمل معلومات مهمه جدا بيوفرها لكم دكتور عطية داود طريقه سلسه وسهله.

فى هذا التقرير يقدم موقع “EGYPTANA PRESS” دليلاً للأمهات الجدد للإطلاع على أهم تطورات الطفل منذ ولادته و فى شهره الأول من كافة النواحى سواء التغذية أو النوم أو الأمراض التى قد تصيب الأطفال فى هذا الشهر.
إهتماما منا وبحرصنا الشديد على سلامة أطفالنا  يقدم لكم موقعنا ” إيجيبتانا ” 
إرشادات الدكتور /دكتور عطية أخصائي طب الاطفال وحديثي الولادة

40 معتقد خاطئ عند بعض الأمهات …. أكتشفوها 

١ -الطقطقة عمرها ما كانت ولا هتكون نقص كالسيوم وعادى جدا وبناخد كالسيوم بناءا على تحاليل.

٢- ابنك سخن من غير أي اعراض تانية … يأكل سمك وبيض عادى جدا بس إنما لو سخن مع ترجيع او اسهال…لازم طبعا أخد بالى من اكله…يعنى يأكل شوربة لسان عصفور – شوربة خضار – تفاح – جزر – بطاطس ونبعده عن السكريات والكوسة والشيكولاتة والشيبسي والمياه الغازية.

٣- اللبن بعد الموز عمره ما يضر الطفل.

٤- السمك واللبن والبيض عمره ما هيضر الطفل بردو.

٥- اللبن البقري او الجاموسي ممنوعين قبل سنة…. لكن منتجات الالبان زي الزبادي والجبنة القريش عادى جدا من تمام ٦ شهور رغم أن فيها اختلافات بس خلينا في الرأي الراجح.

٦- لو قعدنا نلحس للطفل قهوة عمره ما هيبقي أذكي ولا هيتكلم أسرع بالعكس هيسهرك وانتي اللي هتقعدى تكلمي نفسك طول الليل هو هيفوق وانتي هيغمي عليكي.

٧- الطفل عمره ما يجيله انيميا الفول الا لو عنده استعداد وراثي مولود بيه يعنى البقوليات مش هى السبب.

٨- اللي يقولك ان الطفل اللي عنده اربعين يوم لو ما أكلتيهوش هيطلع بيكره الاكل … الحقيقة مش لاقى كلام أقوله غير أن اللي يقول كدة يستاهل الإعدام في ميدان عام.

٩- تقبل الطفل للأكل طبيعة واستعداد ليس إلا… والأطفال مش زي بعضها كل شيخ وله طريقه.

١٠- وحياتى عندكم بلاش رضعة بيبي درينك واعشاب في المستشفي بعد الولادة ….. الرضاعة فقط.


الإجراءت الأولية اللازمة بعد ولادة طفلك

 


١١- اول يوم بعد الولادة ما تقوليش مفيش لبن وبعدين اسألك طب فيه لبن السرسوب؟ تقوليلي اه … على اساس ان لبن السرسوب مش لبن … والله لبن غنى جداً بالبروتينات وكل العناصر اللى جسمه محتاجها و بيكفي الطفل جدا و بيغني عن اي حاجة تانية.

١٢- بالله عليكم بلاش كلمة لبنى خفيف ومش بيشبع …لو وزنه بيزيد كويس خلاص بلاش فتي وبلاش صناعى.

١٣- مفيش حاجة اسمها البنات بيرضعوا اكتر من الولاد…فيه طفل بيرضع كتير وطفل قليل بس كدا.

١٤- بلاش الطفل اللي بيرضع صناعي تشربوه مية من اول يوم لأن انتي اصلا بتعملي الرضعة بمية فبلاش حجج واهية انه عطشان.

١٥- الطفل بعد سنة اللبن عمر ما فايدته بتضيع وربنا قال في عامين

١٦- الشكوى المتكررة….. ابني بيعيط ويمص صباعه وحاساه مش بيشبع وصدري مش تقل باللبن وبعصر بينزل نقط مش بملي ازازة معلش بلاش مبررات هنسأل تاني وزنه زاد؟ طب بيعمل بول كويس يبقي شكرا… متخليش حد بقي يضحك عليكي وربنا يعينك.

١٧- الخوافض اول 6 شهور سيتال … تاني 6 شهور بروفين…. بعد السنة ممكن دولفين او كاتفلاي بس بشرط يكون الطفل سخن جدا يعني كمادات وخافض فقط وربنا معاكي.

١٨- الاسهال اللي زي المية علاجه مش سميكتا ولا هيكون كابكت …. هناخد محلول جفاف ونكشف …اهم حاجه نعوض جسم الطفل بالسوائل بس

١٩- الطفل اللي بياخد مضاد حيوي كتير سنانه مش بتتاثر …مناعته هى اللي بتتأثر لو بناخده من نفسنا بدون وصف طبيب.

٢٠- نقط علاج الصفرا ودواء شراب والاقراص اللي بتدوبوها والحاجات دي كلها ملهاش لزمة …الصفرا اما فسيولوجية و هتضيع بالرضاعة او مرضية و عايزة حضانة خدي بالك.

٢١- الكالسيوم بنقولها كتير لازم تحليل والا بيترسب على الكلي.

٢٢- دوا المغص والخافض …. عند اللزوم بس.

٢٣- نقط الڤيدروب بنستخدمها كوقاية والفيتامين د النشط علاج لحالات معينة.

٢٤- طفلك لما يشرق بلاش تنفخي في وشه … خبطي على ضهره كفاية.

٢٥- لو أخذ دوا وبعدها رضع او شرب مية …الدوا مفعوله مش هيقل خالص.

٢٦- لو وقفتي الطفل علشان يشد رجله و مشدهاش…عادى جدا على حسب عمره ومش معنى كده انه يبقي محتاج كالسيوم.

٢٧- الطفل لو اخد التطعيم و ما سخنش …عادى جدا ومش بايظ ولا حاجة.

٢٨ تغيير لون البراز عادى جدا … اهم حاجة ميكونش اسود ولا أحمر ولا أبيض.

٢٩- مفيش حاجة اسمها جرعة ديدان وقائية… ولكن ممكن نديها لأفراد العائلة الواحدة عند اثبات اصابة فرد فيهم بتحليل البراز.

٣٠- مفيش حاجة اسمها أبني دفيان…. فيه اختراع اسمه ترمومتر بيقيس الحرارة … لو اكتر من 37.5 يبقي سخن … غير كده لأ.

٣١- التسنين مش بيسبب برد او كحة او التهاب في العين بالكتير ممكن حرارة بسيطة متعديش 38 وريالة وزن مستمر.

٣٢- جلسات الاستنشاق أو النفس وكمان البخاخات مفيش منها أى تعود ولا حاجة وهي أحسن وأامن علاج للكحة أو حساسية الصدر.

٣٣- الكورتيزون اللي موجود بالبخاخات مفيش منه اى مشاكل.

٣٤- الحقن قبل سنتين على الأقل بتكون في عضلة الفخد فقط (نفس مكان التطعيم).

٣٥- ابن أربعة شهور متربعهوش بالله عليكم … القعاد مسنود من السادس ولوحده لحد ٩ شهور..

٣٦-التسنين طبيعي من ٦شهور حتى ١٣ شهر وبرضو مافيش داعي للكالسيوم واخرجنا فيتامين د.

٣٧-اللي عنده سنه ولسه ممشيش مش كارثه ولا حاجه ده طبيعي والله وبرضو مافيش داعي للكالسيوم.

٣٨-الطفل ممكن يتكلم جمل قبل سنه عادي دي قدرات فرديه. مش لازم ابنك يبقى زيه.

٣٩-التليفون والتليفزيون هو السبب الرئيسي للطفل اللي متأخر في الكلام. مش علشان نسكتهم ندخلهم في توحد.

٤٠-الحديد وقايه من سن ٤شهور وبرضو مافيش داعي للكالسيوم من غير تحاليل.

 

 

Facebook Comments

شكرا لقرأتكم موضوعاتنا ، أترك تعليقك على الموضوع

%d مدونون معجبون بهذه: